Latest

Paano Ipinta ang Gagamba 1

U Eliserio, Paano Ipinta ang Gagamba 1, video

In Paano Ipinta ang Gagamba 1, U Eliserio provides a step by step guide on how to paint a giant spider.

U Eliserio’s Mga Hayop at Halimaw is a series of sculptures featuring a variety of animals and monsters. Click here for more information.

John Lennon

Isa sa mga pinakareaksyonaryong linya ni John Lennon ay matatagpuan sa “Working-Class Hero”: “Mga putang inang paysano lang kayo sa mga mata ko”. Bagaman tinutuya niya ang mga social climber na ang tingin sa sarili’y lampas na sa usapin ng uri (at tunggalian ng mga uri), napanghahalata sa kanyang paggamit bilang pejorative sa “paysana” ang kanyang limitadong pagkakaintindi sa sitwasyong panlipunan labas sa Kanluran. Bagaman si Lennon din ang nagsulat ng mas lalo pang reaksyonaryong “Revolution”, dahil lumabas iyon noong nasa Beatles pa siya, irereserba ko ang mga hirit ko sa kanyang iyon pagdating ng sanaysay ko tungkol sa banda.

Photo by Pixabay on Pexels.com

Hindi lang sa pulitika mali-mali si Lennon. Sa simula ng “Happy Xmas”, halimbawa, sinabi niya, “Ito pala ang Pasko, anong ginawa mo? Isang taon na naman ang natapos, isang taon na naman ang nagsimula”, na para bang walang Disyembre 26 hanggang 31. Ito’y lantarang panunupil sa anim na araw, at pagrerebisa sa kahulugan ng “taon”. Hubad itong pagsasakripisyo sa harap ng altar ng–ano?–poetic license? Hindi nga ba’t isinasaayos ng kapitalismo ang buhay natin sa mga susing araw ng konsumerismo, (Pasko, Bagong Taon; tingnan lalo na ang 11/11, 5/5, atbp). Katulad lang din ito ng pagtapat ng estasyon ng MRT sa mga mall (bakit kailangang magkatabi ang Shang at Ortigas, at sobrang layo ng Annapolis sa Ortigas?) (utang ko ang kabatirang ito kay Michael Andrada), pinapalabas na “wala” o “hindi binibilang” (“doesn’t count”) ang mga espasyong hindi pinagkakakitaan. Nang igugel ko ang “John Lennon song used in commercial” pala lang iberipika na tama akong ginamit ang linya ng “Beautiful Boy” (na tungkol sa kanyang anak) (“Araw-araw sa bawat paraan, naging mas mahusay”) sa palatastas ng Philips, susmaryosep natuklasan kong hindi lang pala ang kantang ito kundi marami pa ang ginamit ng iba’t ibang multinasyonal na kompanya. Gaano man kasinsero ang pagkakritikal na Lennon sa kapitalismo, talagang mahirap iwasan ang pag-angkop ng makinang ito.

Pero hindi kailangang kainin ng kapital ang “Imagine” para maging isa sa pinakakinamumuhian kong kanta. Ito ang pambansang awit ng lahat ng virtue signaller na naengkwentro ko, at sa videoke sa Xmas party sa aming departamento man o sa episode ng Dawson’s Creek, hindi ko talaga mapigilang uminit ang ulo pag binabanggit (o, mas malala, kinakanta) ito.

Syempre pa, hindi ako naniniwala sa seksistang mito na sinira ng alagad ng sining na si Yoko Ono ang Beatles. Sa pagkakaintindi ko, ang ego nina Lennon at Paul McCartney ang tumapos sa kanilang samahan. Sa YouTube, pwede mong isearch ang “Yoko Ono Firework” at mapupunta ka sa isang channel na puro nga ganoon ang teksto, cover daw ni Yoko Ono ng “Someone Like You” at “I Knew You were Trouble”. Tutugtog ang musika, at sisigaw si Yoko Ono: “Aaaa gaaa waaa”. Akala ko ang galing-galing ni Yoko Ono, at ilang taon pa bago ako sabihan ng isang kaibigan na ginawa lang pala ito ng YouTube bilang parodiya. Saktong-sakto kasi sa imahen ni Yoko Ono bilang alagad ng sining. Pero hindi naman ako masyadong nahihiya, kasi hindi alam ng mga commenter sa mga video na parodiya nga ito, at panay pa rin sila ng hirit na “hindi marunong kumanta” si Yoko Ono, at na, oo, pineste niya ang Beatles. May mga tao talagang walang sense of humor.

U Eliserio’s second album, Chant Yon, will be available on October 31, 2022. Click here for more details.

Queen

Nasa elementarya ako nang una kong maengkwentro ang Queen. May binisita kaming eskwelahan, at may kumanta ng “Bohemian Rhapsody”. Akala ko talaga tungkol ito sa isang OCW (hindi pa OFW ang tawag sa mga nag-aabroad noon), hindi ko na maalala kung bakit, basta iyon nga, “Nanay, kakapatay ko lang ng tao”. Hindi ko pa alam na kanta ng Queen iyon. Hindi ko rin alam na kanta ng Queen ang “Flash”, o ang “Princes of the Universe”, na alam ko bilang bahagi ng opening ng Highlander (isa sa mga paborito kong palabas sa telebisyon).

Photo by Pixabay on Pexels.com

Noong huling bahagi ng 90s at maagang bahagi ng 2000s, nahilig kami ng tatay ko sa pagbili ng mga CD at VCD. Isa sa mga una naming nabili ang koleksyon ng mga kanta ng Queen. Paborito niya ang “I Want to Ride a Bicycle”, dahil daw kinokumpirma nito na tama ang pagbigkas niya ng “baysikol”. Wala ang “Flash” at “Princes of the Universe” sa binili naming CD. Wala rin ang isa sa pinakamahusay na kanta nila: “Too Much Love Will Kill You”. (Ang isa sa nasa CD? “Fat-Bottomed Girls”.)

Ang maganda sa Queen, hanggang ngayon nakakagusto pa rin ako ng awit na saka ko lang malalaman na sila pala ang gumawa (pagkarinig sa radyo sa kotse, itatanong ko sa asawa ko: “Sinong kumanta nito?”). Ito ang kaso sa “Radio Ga Ga”, at “Ice Ice Baby” (este, “Under Pressure”).

Dahil siguro hindi puro awit ng pag-ibig ang likha, hinog ang Queen para sa mga maling dinig. Sabi halimbawa ng kaklase ko noong kolehiyo, ang linyang “Walang oras para sa mga taluhan” ng “We are the Champions” ay nasa Latin. Hindi ko na maalala kung ano ang ibinigay niyang ibig sabihin nito, pero alam kong hindi ko rin maintidihan ang linya, at naniwala ako sa kanyang paliwanag.

Pero ang kantang alam na alam ko ang lyrics sa panahong ito ay ang sa “Bohemian Rhapsody”. Nga lang, sa kaso yata ng kantang ito, kailangan kong aminin na hindi sapat ang lyrics para maintindihan. Sa kasong ito, kailangan ko yatang sabihin na may wika ang musika na hindi ko kayang isalin sa prosa. May kahulugan ang mga pangungusap sa kanta, pero hindi sila maaaring tumindig bilang mga pangungusap lamang. May iba silang pag-iral kasama ang musika, at ang tekstong ito (ang musika) sa kabuuan ang kinahuhumalingan ko. (Paumanhin sa pagiging metapisikal.)

Hindi ko napanood ang pelikulang Bohemian Rhapsody (2018, hindi ko na babanggitin kung sino ang direktor), at hindi ko alam ang mga detalye sa buhay ni Freddie Mercury. Isang homophobic na kamag-anak ang nagsabi sa aking “pinagtawanan” daw si Mercury nang mamatay mula sa komplikasyon dulot ng AIDS. Hilingin ko mang hindi sana ito totoo, alam kong malamang sa malamang ay totoo nga. Gayumpaman, ang alagad ng sining ay maaaring tumagal ng 10,000 taon, samantalang ang mga tumutuligsa sa kanya’y mas maagang nawawala. Hindi lang naman kultural na imperyalismo ang dahilan kung bakit humaling na humaling ako sa musika ng Queen. (Pero, devil’s advocate, “Sino ang gustong mabuhay nang walang hanggan?”)

Dahil nga hindi ako marunong kumanta, gusto ko ang mga kanta ng Queen dahil pwede silang isigaw. Bukod sa “We are the Champions”, nariyan ang “We Will Rock You”. May lyrics ito, at ngayong pagkatsek ko lang natuklasan na malungkot pala ang banghay. Buong akala ko’y nagtagumpay si Buddy. Iyon pala nauwi din siya sa pagkakaoon ng putik sa mukha, sa pagiging “malaking kahihiyan”. Nasorpresa na naman ako ng Queen.

U Eliserio’s second album, Chant Yon, will be available on October 31, 2022. Click here for more details.